Æviágrip - Jón Ingimarsson, formaður Iðju 1946-1981
Jón Kristján Hólm Ingimarsson var fæddur 6. febrúar árið 1913. Foreldrar hans voru Ingimar Jónsson iðnverkamaður og María Kristjánsdóttir. Bernskuheimili Jóns var Tóvinnuvélahúsið, eða Gefjunarhúsið, sem stóð í hallanum sunnan við Gefjunarverksmiðjuna. Það hús stendur nú við Byggðaveg. Fjölskyldan bjó á efri hæð hússins. Ingimar, faðir Jóns, starfaði á Gefjun í áratugi, frá 1912-1944.
Árið 1930 hóf Jón störf í verksmiðjunni og starfaði þar til ársins 1946 eða í 16 ár. Á þessum árum hafði Jón áunnið sér slíkt traust og vinsældir meðal starfsmanna að þeir héldu honum samsæti á Hótel Norðurlandi og færðu honum góðar gjafir í þakklætisskyni fyrir góða viðkynningu og fórnfúsa þátttöku í félagslífi starfsfólksins. Jón starfaði síðan sem verslunarmaður hjá Pöntunarfélagi Verkalýðsins sem rak búð í Hafnarstræti 87 þar sem skóbúð er nú. Síðar starfaði hann sem vörubílstjóri hjá Stefni í nokkur ár. Árið 1954 gerðist hann starfsmaður fulltrúaráðs verkalýðsfélaganna á Akureyri og átta árum síðar starfsmaður Iðju.
Jón var einn af stofnendum Iðju félags verksmiðjufólks árið 1936 og tók frá upphafi virkan þátt í starfsemi félagsins. Hann var kjörinn gjaldkeri þess árið 1939 og síðar ritari. Árið 1946 var hann kjörinn formaður félagsins og gegndi því embætti til dauðadags eða í alls 35 ár. Þegar Landssamband iðnverkafólks var stofnað árið 1973 var hann kjörinn varaformaður þess. Jón sótti fjölmörg þing sambandsins og einnig þing Alþýðusambands Íslands í áratugi. Hann sinnti margvíslegum trúnaðarstörfum fyrir Iðju í gegnum árin, gekkst m.a. fyrir orlofsferðum félagsmanna og kom á fót Sjúkrasjóði Iðju. Hann ritstýrði Iðjublaðinu í 17 ár.
Jón var atkvæðamikill í starfi Sósíalistafélags Akureyrar um árabil og síðar Alþýðubandalagsins. Hann sat í bæjarstjórn Akureyrar 1962-1970 (varamaður 1946-1962 og frá 1970-1978) og starfaði í ýmsum nefndum bæjarins. Jón vann ötullega að mörgum réttlætis-og framfaramálum. Hann var einn af stofnendum Sjálfsbjargar, félags fatlaðra á Akureyri og Styrktarfélags vangefinna. Hann vann enn fremur mikið starf í þágu aldraðra.
Jón var ágætur fimleikamaður á sínum yngri árum og tók m.a. þátt í frægri sýningarför Leikfimifélags Akureyrar til Reykjavíkur árið 1932. Hann var lengi meðal fremstu skákmeistara Norðlendinga, tefldi á skákmótum Skákfélags Akureyrar og öðrum skákmótum í hálfa öld, m.a. í landsliðflokki á Skákþingi Íslands og á Norðurlandamóti. Hann varð skákmeistari Norðlendinga árið 1961. Jón sat í stjórn skákfélagsins í 27 ár og var formaður þess í 16 ár, eða lengur en nokkur annar. Árið 1973 gerði félagið hann að heiðursfélaga sínum. Þá sat hann í stjórn Skáksambands Íslands um skeið.
Jón var mikill leiklistarunnandi. Hann tók virkan þátt í leikstarfsemi starfsfólksins á Gefjun á árunum 1941-1971. Hann starfaði einnig með Leikfélagi Akureyrar í fjóra áratugi, lék m.a. í mörgum uppfærslum þess á árunum 1942-1971. Formaður félagsins var hann á 50. afmælisári þess. Jón var oft fenginn til að skemmta á samkomum enda ágætur söngmaður. Hann lék vel á harmoniku. Eiginkona Jóns var Gefn Jóhanna Geirdal Steinólfsdóttir frá Grímsey. Þau eignuðust fimm börn.
Jón lést 15.2. 1981.
Einn af samherjum Jóns skrifaði þetta um hann að honum látnum:
„Hann var hugsjónarmaður, viðkvæmur í lund og mátti ekkert aumt sjá og vildi hvers manns vandræði leysa. Það þarf varla að tíunda að oft hefur hann átt erfitt á ævinni vegna þess hve hann var yfirhlaðinn störfum en hann var glaðlyndur i eðli sínu og hláturmildur og ég minnist margra ánægjustunda með honum bæði i starfi og utan.“
Jón skáld frá Pálmholti skrifaði í minningargrein um nafna sinn: "Jafnvel klettarnir hrynja. Fallinn er Jón Ingimarsson formaður félags verksmiðjufólks á Akureyri, einn traustasti varðmaður fátæks fólks hér á landi.“
462 3600 | 
