Munir frá Iðnaðarsafninu marka gönguleið

Tromlan er mjög þung og vafi lék á hvort kraninn gæti lyft henni. En Gunnar Malmquist bifreiðarstjóri er fagmaður fram í fingurgóma. Hann hífði tromluna varlega upp á pallinn og kom henni áfallalaust á sinn nýja stað, suðvestan við tjörnina.

Þessa dagana er unnið að mörkun og fegrun gönguleiðarinnar sem tengir Krókeyrina við innbæinn. Framkvæmdin er liður í samstarfi Akureyrarbæjar og safnanna á þessu svæði og er ætluð til að auka sýnileika safnanna og auðvelda göngutúrinn þeirra á milli. 

Söfnin sem um ræðir eru Mótorhjólasafn Íslands, Iðnaðarsafnið, Minjasafnið, Nonnahús og Leikfangasafnið. Einnig verður unnið að því að auðvelda áframhaldandi göngu suður á Flugsafnið, en til þess þarf m.a. að gera gangbraut yfir Eyjafjarðarbraut.

Þrír stórir munir í eigu Iðnaðarsafnsins, tromla úr Sútunarverksmiðjunni á Gleráreyrum, áburðardreifari og síðast en ekki síst kranabíll frá Möl og sandi, hafa nú þegar verið færðir að göngustígnum. Við þá gripi verða settir vegvísar sem vísa fólki áfram inn á safnasvæðið á Krókeyri.

JSF